Xabsi Caashaq

Ereyada: Ayaan Kaaba Axmed Caydiid

Luuqda: Faysal Muniir

Laxanka: Xariir Axmed

 Iga daa xusuusaha

Xayiraadda iga qaad

Ii keen xorriyaddii

Aan xidhiidh samaystee

Maxaa laygu kaa xidhay

Ee aan xogtaadiyo

U rabaa xaggaagoo

Adba iima xiistide

Xubbigeennu sow kii

Goor hore xijaabtee

Lagu daray xabaalaha

Ma xuskaan talo u waayay?

Xabsi caashaq lee yahay

Ka hayaa xil weynoo

Xoghayntiisa aan ahay

Ma anaan xisaabtamin

Oo kuu xidhxidhanoo

Mise xiisahaagaa

Xarka gosytay inan yahay?

Qeyrkey xisaab li'i

Farxad bay xadreeyaan

Anigana xayaatada

Xallad iima laha badan

Gafku maaha xaaraan

Waase lagala xaalaa

Qofka aad is xagataan

Ama kala xanaaqdaan

Xabsi caashaq lee yahay

Ka hayaa xil weynoo

Xoghayntiisa aan ahay.

Fiiro: maansayahanadda heesta alliftay waxay barteeda Facebook ku sheegtay in qisada heestu ay nolosheeda ku saabsan tahay. Ayaan waxay tiri, "Ereyadan waxa aan curiyey mar aan xaaladdaas ku sugnaa, Alxamdulillaah hadda waan bogsadey, balse waxaan u hibeynayaa qof kasta oo xaaladdan ku sugan iyo inta ay qancisaba. Maanta waxa ay iiga dhadhan duwanaayeen maalintaan qalinka u qaatay, balse waxaan hubaa dad ayay dhadhan u samayn doonaan maanta."

HEESO KALE OO QORAAL AH