Ubaxii Baxaayaay!

Erayada: Cabdi Aadan Xaad (Cabdi-Qays)

Laxanka: Cabdi-Qays?

Luuqda: Maxamed Warsame Qaasaalli

Ilaaheenna weyn baa

Amarkiisu fulayaa

Inaad adigu talisaad

Ayaamahan is mooddee;

Anoo oon kalgacal qaba

Waadigii abaallaay

Iga awtay dhegahee …

Waa adduunyoo

Illeen aayo ma lahee

Ubaxii baxaayaay

Sow adigan abaarsaday!

Nabsi waa aleel cuna

Adhaxda iyo feedhahoo

Waa mici abeesoo

Aayaha ku legaddee;

Ma illoobin goortaad

Nabadeennii aasteed

Arxan iga fogaysee…

Waa adduunyoo

Illeen aayo ma lahee

Ubaxii baxaayaay

Sow adigan abaarsaday!

Ugbaadkiyo dooggay

Adduunyadu ku naaxdaa

Urshi ma laha meeshii

‘Udub?’ lagu tilmaamaa;

Laba eefka dhaxaad

Afar qaadday socodkee

Haddaad uub ka lulataa…

Waa adduunyoo

Illeen aayo ma lahee

Ubaxii baxaayaay

Sow adigan abaarsaday!

Xiddiggaygii aasnaa

Ururkuu ku biiroo

Soo celi iftiinkoo

Ili qabatay weeyee;

Alla magane waan rabay

Inay kugu adkaatoo

Cidna eersan waydee…

Waa adduunyoo

Qosol kuma idlaatee

Ila arag ‘ax’ iyo ‘way’

Inay urugo leedahay

Inay oohin leedahay!  

Heeso Qoran