Googgaa

Ereyo: Maxamed Aadan Dacar

Luuq: Sahra Axmed Jaamac; Cabdulqaadir Cumar Macallin (Jubba); Aamina Cabdillaahi Xirsi; Axmed Mooge Liibaan.

Sahra iyo Aamina:

 googgii, googgii, googgii googgii.

Jubba iyo Mooge:

 cigalle, cigalle cigalle cigalle.

Sahra:

 googgaa, googgaa, googgaa googgaa.

Jubba:

 cigalle, cigalle cigalle cigalle.

Sahra:

Haddaad geed beer ka beerto
Garaac iyo godin u diiddo

Gu’yaal badan aad sugayso

Hadduu goonni isu taago

Hadduu guudka miro ku yeesho

Adoo gurashada u baahan

Laamaha gacantaadu gaadho

Haddii aad goosan waydo

Malabka guudkiisa saaran

Indhaha gacaltooyadoodii

Naftii gocoshada ku raagtay

Galladdaa ma ku sabi kartaa.

Cabdiqaaddir-Jubba:

Ma garan sheekada guntane

Ha ii soo guud marine

Maahmaah waa laga gudbee

Haddaad geeddi meel u tahay

Haddaad u gol leeday xaajo

Intaan gaarigu dhaqaaqin

Meel baan yara gaari laa

Ha soo gaangaabinine

Ka saar galka seefta oo

Goobjoogba ha loo noqdee

U sheeg guurtida kalana

Gorfaynta ha la wada maqlee.

Aamina Cabdillaahi:

Hadalku gees kama rarree

Warkuba waa gaabanyee

Xisaabta u gee ka goo

Ayaa dib u gurasho lee

Tilmaan daaqsin geel u mari

Nin garasho leh baa la yiri

Su’aashii hore ka gudub

Gurgurka qaansada ku noqo

Gashaantimo waannu nahay

Gayaankayo waad tihiin

Rabbaa isu keen galladay

Guudkaannu idiin fidhaynnay

Guur iyo ballan baan lahayn

Jacaylkii baa godladay

Waqtigu waa galab-carrow

Geeriyo geeddaa jiree

Gees uun baa loo dhacaa

Galbiska idinkaa hayee

Goormaan wada aqalgalnaa?

Mooge:

Gabdhow waa yeelkadiin!

Garaad dumar baad siddaan

Gu’yaal sheekadii jirtee

Dunidu waa galabba cayn

Harka labadiisa gelin

Ilbuxuu u gaarayee

Markaad geel dhaqatid baa

Gaawaha loo soo cushaaa

Gacmaha yaa idinku jira?

Goormaa laga tagay warkaa

Cishqigu wuu gaaggaxoo

Guurkii waa laga noqdee!

Ka gooya caloosha taa

Gayaanku waa badan yahee

Geyiga rag u doonta oo

Ha goconina wacad horee

Go’aankaan dambuun ka raac

Ma qasab baa goobta yaal?

Guudbaay jaaw gacallayaal

Geestaad doontaan u qaata oo

Gammuuran!

Gam oo gayaxan!

Fiiro: heestani waxay ka mid ahayd ruwaayaddii Beeney Waa Run. Ma hubno in magaceedu 'Googgaa' yahay. Haddii aad magaceeda saxda ah taqaanno, fadlan hoos faallo ahaan ugu qor.

Heeso Kale oo Qoraal ah