Axaddii — Maxamed Mooge

Erayada: M. I. Warsame “Hadraawi”

Laxanka: Cabdikariin F. Qaarrey “Jiir”

Luuqda: Maxamed Mooge Liibaan

Waa la ii addimay

Axaddii sidaan

Kuu eegayee

Araggeeda tii aan

Ku ildoogsadaay

Ma illowsan tahay

Axdigii aad martiyo

Meeshii aad i tidhi

Waan imanayaa?

Imisaad farriin

Ergo soo dirtood

Oontiyo biyaha

Cunto aawaday

Uga soommanayd!

Eed layga keeniyo

Midna amar Ilaahay

Kuma aad maqaanine

Adigayska baaqdee

Haddaad i tidhaahdo iman maayo

Ma aadeen halkaad ogsoon tay

Indhahaa habeenkii

Ku ilaalinayoo

Dhammideed adduunyada

Afarteeda waaxyood

Hadba gees u eegee

Anigaa is la hadloo

Mar waxaan idhaahdaa

Ku illaawi maysoo

Way imane sii joog;

Mar waxaan idhaahdaa

Axdigaydin dhigateen

Kolna oofin maysee

Samir Eebbe qaadoo

Ka fagow agteedaan

Uurkayga geliyaa

Aramida jacayl baa

I hoggaaminaysoo

Misna ka ma adkaystoo

Ka ma hoydo aydee

Naftu olol ma daysee

Aamusnow habeenkii

Ugbaadka iyo dooggaa

Tiiraanyo ooyoo

Idilkood xiddigahaa

Afar qaaday socodkee

Ubax baan guroo

Soo ururiyoon

Amranow golii

Ooddii madhnayd

Ku ilaxidhoon

Ku ag daadiyoon

Weheshada idhee!

Eedaanka diiggoo

Oogsaday salaaddiyo

Waagoo iftiimaan

Keligay inaan ahay

Asaraar ka saaroon

Addimada cuskadayoon

Dib u soo arooree

Bal siday ahaataba

Laba eeftay caawee

Ruux ammaano lumiyoo

Iibsaday xilkeedii

Samaan uga ma aayee

Aan kala war haynnaan

Ku afgooyay heestee

Maxay adiga ku la tahay?!

Faallo: Heestan Axaddii waxaa qaaday dhawr heesaa oo Axmed Cawad Rabsha ugu horreeyay. Waa hees laga soo dheegay mid Carbeed oo magaceeda la yidhaahdo “ليلة السبت” oo heesaagii reer Soodaan ee Saalax ibnu Baadiya qaadi jiray. 

Heeso Qoran