Kalgacaylku Waa Qani

Erayada: Cabdillaahi Diiriye Sooraan

Laxanka: Saalax Qaasin Naaji

Luuqda: Hibo Maxamed (Hibo-Nuura)

Hibo-Nuura

Kalgacaylku waa qani

Caashaqa ka qara weyn

Qurux iyo wanaag badan

Waana shay ku qaaliya

Qiimaynta aadmiga;

Labada is la qaaddana

Qalbigooda ka ma go’o

Waxa’n igaba kaa qaban

Kuu quudhi maayee!

Qummanow ujeeddada

Waanada adoon qubin

Soo dhowee qalbi furanoo

Oon qoonsimaad layn

Geestaada i la qabo!

Saalax Qaasin

Allow yaa habeen qura

Uurkayga qala oo

Qudha oon layga jarin

Quruumaha ku loollama

Ku yiraa garta u qaad;

Taladan qandowdee

Aan qawda ku hayaa

Qotadeedu dheeraa

Insha Allaahu waan qaban!

Qalanjooy innana dee

Haddii laysu keen qoray

Oo an quud isku leenahay

Waysla qosli doonnaa

Adna taa qiraha geli!

Hibo-Nuura

Beri baa nin qaariya

Qoomkuu la noolaa

Qawlka uu yidhaahdaba

Haddii uu Quraan yahay

Ay ka qaadan waayeen!

Kol adoon i qadinayn

Quluubtu way ku raacdee

Nafta aan qaboojee

Hadal quruxsan ii sheeg

Qummanow ujeeddada

Waanada adoon qubin

Soo dhowee qalbi furanoo

Oon qoonsimaad layn

Geestaada i la qabo!

 Saalax Qaasin

Adduunyada qorshaa jira

Iyo qaabab waaweyn

Qarar oodan baa jira

Qaxar iyo dhibaatana

Intaa way dhex qaadaan;

Qoonteeda sheekada

Waan qaadi doonnaa

Qarqarsiga ku jiidoo

Hawlaha ma qabannaa?

Qalanjooy innana dee

Haddii laysu keen qoray

Oo aan quud isku lee nahay

Waysla qosli doonnaa

Adna taa qiraha geli!

------------- 

Faallo: Waa hees ka mid ah heesihii riwaayaddii Dhedo Roob Noqon Wayday ee C. D. Sooraan sameeyay. 

Heeso Qoran