Jacaylkaa Dhiggiisoo

Erayada: Ciise-Ganey

Laxanka: Cabdikariin-Jiir

Luuqda: Xasan Aadan Samatar

Ilmo dhawr habeen jiray

Haddaan waalidkii dhalay

Dhibaatada ka celinoo

Hayga dhicin ha dheelliyin

Dhabta waayo lagu hayn

Inta uu dhammays noqon

Dhakhso u ma koraayoo

Dhici mayso qayrkii

Inu dhinac istaagee;

Jacaylkaa dhiggiisoo

Dhaqaalaha u baahane

Waa in la is la dhawraa

Haddii kale se lagu dhimay!

Geelaan nin dhiirrani

Dheelmaynin galabtii

Dharaartiina Hawdkiyo

Kaymo Dhebi le daaqsiin

Bahal soo dhacaayiyo

Tuug dhuumanaayiyo

Dhuugiyo qaniinyiyo

Dhukaan lagama waayoo

Markaa dhimasho waw halis;

Jacaylkaa dhiggiisoo

Dhaqaalaha u baahane

Waa in la is la dhawraa

Haddii kale se lagu dhimay!

Dhir haddii la beeroo

Dhulka lagu tallaalo

Biyaha dhuubka loo darin

Loo qiyaasin dhoobada

Ma dheeraado xididkuye

Laamo dhumuc u yeeliyo

Ubax wada dhalaaliyo

Dhaameel ma bixisoo

Dhali mayso midho wacan;

Jacaylkaa dhiggiisoo

Dhaqaalaha u baahane

Waa in la is la dhawraa

Haddii kale se lagu dhimay!

Heeso Qoran