Haddii Dabkii Dhaxmoodo

Erayada: Xasan Sheekh Muumin[i]

Luuqda: Cabdi Muxumed Ammiin iyo Hibo Maxamed Huddoon (Hibo-Nuura)

Cabdi Muxumed

Doc kastoo la eego

Noloshu dunidu waa dabkee

Hadduu dabkii dhaxmoodo

Maxaa lagu diiriyaa?!

Waa tilmaan la daahoo

Degdeg ku ma habboone

Adoo deggan u fiirsoo

Ujeeddada i deeqsii

Hibo-Nuura

Ruux haddii la doorto

Derajadii la saariyo

Xilka daryeeli waayaa

Dab dhaxmooday weeyee!

Waa su’aal da’ weynoo

Madaxa daalinaysee

Wixii lagu diirinaayo

Dadweynahaa la wayddiin!

Cabdi Muxumed

Durdurkaa laga cabbaa

Biyihiis lagu dabbaashaa

Hadduu harraad dareemo

Darkee laga waraabshaa?!

Waa tilmaan la daahoo

Degdeg ku ma habboonee

Adoo deggan u fiirsoo

Ujeeddada i deeqsii

Hibo-Nuura

Ruuxa duunyo haystee

Dahabkana barkanayee

Wixiisi deeqi waayeen

Durdur oomay weeyee!

Waa su’aal da’ weynoo

Madaxa daalinaysee

Darkii laga waraabin

Dadweynahaa la wayddiin!

Cabdi Muxumed

Qofkii cudur dilaayo

Dawadaa bogsiisee

Hadday dawo bukooto

Maxaa lagu dabiibaa?!

Waa tilmaan la daahoo

Degdeg ku ma habboonee

Adoo deggan u fiirsoo

Ujeeddada i deeqsii

Hibo-Nuura

Dallaalimada Diintiyo

Distoorkiyo xeerka

Haddii dabool la saaro

Dawo bukootay weeye

Waa su’aal da’ weynoo

Madaxa daalinaysee

Wixii lagu dabiibi

Dadweynahaa la wayddiin!

Cabdi Muxumed

Subagga dufankiisaa

Dadku ku dhaashadaane

Hadduu dufan basaaso

Maxaa duxdii ka qaaday?

Waa tilmaan la daahoo

Degdeg ku ma habboone

Adoo deggan u fiirsoo

Ujeeddada i deeqsii

Hibo-Nuura

Dhaqanku dugsi weeyaan

Dalkiisu ku dhaatee

Haddii dadkiisi aaso

Dufan basaasay weeyee

Waa su’aal da’ weynoo

Madaxa daalinaysee

Halkii dux looga dooni

Dadweynahaa la wayddiin!

---

[i] Xasan Sheekh Muumin wuxuu ka mid ahaa raggii halabuurka ahaa ee magaca iyo sharafta ku dhex lahaa bulshada Soomaalida. Wuxuu ahaa faylasoof dhaqanyaqaan ah oo aad u xikmad badan. Cilmibaadhisyo ayuu ku sameeyay dhaqanka fog ee Soomaalida. Heestani waxay ku jirtay riwaayaddii uu lixdannadii sameeyay ee la odhan jiray: Shabeel Nagood. Waa riwaayad caalami noqotay oo afka Ingiriisiga loo turjumay oo dad aan Soomaali ahaynina barteen.