Cidna Eersan Maayee (Cabashiyo Caloolyow)

Erayada: Cabdillaahi Cabdi Shube[i]

Luuqda: Maxamed Saleebaan Tubeec

Cabashiyo caloolyow

Ciil kaama bi’iyaan

Talo cayn wareegtana

La is ku ma canaantee

Caqli iyo hubsiinaa

Cidhib looga aayaa

Cidna eersan maayee

Sida ciyowga aydaan

Casarkii dhawaaqaa

Ama cawsha duurkaan

Cidladuun wareegaa

Ciirsi la’ anaa is dhigoo

Iyo culuqaan gaystoo

Cidna eersan maayee

Cirku nimuu ku soo dumay

Cidi ka ma dul qaaddee 

Dhulku miduu la ciirana

Laga caawin maayee 

Cantar kii  haleelaa

Cadkii iga dhammeeyoo

Cidna eersan maayee

Jacayl waa cadaawoo

Cidi kaama qaaddee

Dawo lay cabsiiyiyo

Cashar waan ka quustee

Waxa cunaha dhaafiyo

Cunto waan illaawee

Cidna eersan maayee

Cawo iyo ayaankuba

Calaf Eebbe weeye

Cisigiyo wanaaggana

La ma celin karaayee

Ciirsi la’ anaa is dhigay

Iyo culuqaan gaystoo

Cidna eersan maayee

---

[i] Cabdillaahi Cabdi Shube wuxuu badhtamihii labaatannadii qarnigii tegay ku dhashay tuulo ku taal xeebta Gobolka Woqooyi-Galbeed oo Bulloxaar la yidhaahdo. Wuxuu ahaa halabuur aad caan ugu ahaa tixaha maadda ah. Waa halabuurkii curiyay heeso badan oo ka mid ahaayeen: 1) Buur baa kugu gudbane; 2) Ma la dhuubtay awgaa; iyo qaar kale oo caan ah oo badan. Toddobaatannadii buu ku dhintay magaalada Hargeysa. Allow u naxariiso.