Sida Geed Caleen Loo

Erayada: Axmed Saleebaan Bidde

Laxanka: Maxamed Axmed Kuluc

Luuqda: Maxamed Axmed Kuluc

Sida geed caleeniyo
Ubax guudka qariyeen
Ooy gooni laamaha
Ay midiba geesteed
Hoobaan is gaadhiyo
Guntin midho ah leedahay

Oo soo gandoodoo
Galka faraqa soo daray

Oo godan barwaaqaa
Durdur aan go’ayniyo
Gacan webi ku yaalla

Oon gu iyo jiilaal
Midab guurin baad too

Gabadh yahay kalgacal ba'an

Goortaan ku eegaba

Qalbigayga gelisaa

Wax se aanan garanayn

Ii gunudday caashaqee

Halka aad i gaadhsiin

Sidaad tahay gammaan faras
Senge geesi daaqsaday
Oo uu Garduur miray
Soddon bil iyo gawdeed
Uu goobay farowgii
Sararta iyo gaaddada

Oo galangalcooboo
Cududuhu gammuurmeen

Oo galabba loo raro
Sida ramad gu’yaad dhalay
Hadba kaynta geeda le

Oon guluf colaadiyo
Weli socoto dheer gelin

Gabadh yahay kalgacal ba'an

Goortaan ku eegaba

Qalbigayga gelisaa

Wax se aanan garanayn

Ii gunudday caashaqee

Halka aad i gaadhsiin

Sida gubanka qaarkii

Dhul gargoorku siman yay

Ama maadh galdhiidhoo

Gubatiyo ku taal Hawd

Oo labo gardhoobood

Badhba gees u seexdeen

Dharabkiyo geedaha

Quruxdooda gaarkaa

Ama haro gingimanoo

Guud ka xarfanaysoo

Shinbiruhu ka giigeen

Oon gu’ iyo jilaal

Midab guurin baa too

Gabadh yahay kalgacal ba'an

Goortaan ku eegaba

Qalbigayga gelisaa

Wax se aanan garanayn

Ii gunudday caashaqee

Halka aad i gaadhsiin

Heeso Kale oo Qoraal ah