Godobtayda La Carrow (Gudgude)

Magaca: Godobtayda La Carrow (Gudgude)

Erayada: Cali Cilmi Aflow

Laxanka: Aweys Abuukar Nuur (Goobbe)?

Luuqda: Xasan Aadan Samatar

Siduu yahay gudgude roob

Gaydhiyo dabayl badan

Ban aan geed lahayniyo

Dhul gelgelina kaa helay

Jacayl igu gadaantoo

Markuu ganafka heeryada

Guudka iga saaray

I gurguriyay caashaqu

Ee uu gibishu igu xidhay

I garwaaqsan waydoo

Gacanta igu saydhee

Anna gooha reenkiyo

Gocoshada ma daayee

Meel ay ku gaysaba

Godobtayda la carrow

Nin gunaadku maqan yay

Godka laga abbaaree

Laga ganay ma moogee

Aday gaystay nabarradan

Igu gaaxsanaadiyo

Aramidaan u go’ayee

Adna garasho daraneey

Waad igu gurracantoo

Anigoo dartaa guban

I garwaaqsan waydoo

Gacanta igu saydhee

Anna gooha reenkiyo

Gocoshada ma daayee

Meel ay ku gaysaba

Godobtayda la carrow

Fiiro: waa hees ka mid ah heesihii riwaayaddii “Hablaha Maanta iyo Nin u Holladay Guur”. Waxaa riwaayaddaas sameeyay Cali Cilmi Aflow oo ahaa fuundi/wastaad guryaha dhisi jiray oo reer Hargaysa ahaa. Kolkii danbe, sida aan ka maqalnay dad yaqaannay, wuxuu samaystay moofo/muufo (bakery) roodhida lagu dubi jiray. Hal’abuur heeso qurux badan sameeyay buu ahaa.

Heeso Kale oo Qoraal ah