Laalays

Erayada: Xasan Sheekh Muumin

Luuqda: Hibo Maxamed Huddoon (Hibo-Nuura)
Laxanka: Cabdikariin Faarax Qaarrey (Cabdikariin-Jiir)

Laalays dusheediyo

Laag iyo xaraar dheer

Laan gebi ku taallooy

Lulayaan dabayluhu

Xiisaha ku laalane

Kalgacaylkii lumiyee

Loxoskii ku dumiyee

Guurkii luggooyee

Leef oo ha liqintaa

Lurka ii horseeddee

Laabtaydaneey

Lululka iga daa!

Lahashada naftaydiyo

Caqligaa legdamayoo

Leexadan i sidatee

Maanka iga labaysaa

Shinbiraha lalaayee

Ku dabbaasha laydhaa

Looyaama duur baa

Anna ii lalabayee

Leef oo ha liqintaa

Lurka ii horseeddee

Laabtaydaneey

Lululka iga daa!

Luquntayda dheeriyo

Laafyaha garaaraha

Dhabannada labeenta le

Midabkayga luulkaa

Nimaan laasanaynoo

Luflufku u macaan yahay

Adigaa u loogoo

Lingaxa uga gooyee

Leef oo ha liqintaa

Lurka ii horseeddee

Laabtaydaneey

Lululka iga daa!

Heeso Kale oo Qoraal ah