Digarogasho

Erayada: Maxamed Ibraahin Warsame “Hadraawi”

Laxanka: Cabdikariin Faarax Qaarrey "Jiir"

Luuqda: Maxamed Mooge iyo Shankarroon Axmed “Sagal”

Mooge

Jidhku wuxu dubaaxshaa

Damqadaa halbawluhu

Xididdadu darrooraan

Ama dhiigga daadshaan

Afku hadalka daayaa

Dibnihiisa haystaa

Doqon kaa nasiib lihi

Marka ay ku dooxdee

Birta kaala daashee

Kuu celiso daabkee;

Waxay doodi furan tahay

Ruux kuu darraan jiray

Marka aad ku digatee

Xaqu kuu dulleeyee 

Allahayow nin daacada

Allahayow nin daallina

Deeqdaada haw simin!

Shankarroon

Iyadoo la degayoo

Carradii la duubiyo

Degelkii la taaganyoo

Dadku caafimaadoo

Rabbigay daweeyoo

Danbar laga waraabshoo

Dedkii layga qaadoo

Dabku ii iftiimee;

Indhihii dillaacaa

Laga furay daboolkoo

Dooggiyo barwaaqada

Farxad daawanaayee

Bal dayaay ayaamuhu

Isku derejo maahee

Allahayow nin daacada

Allahayow nin daallina

Deeqdaada haw simin!

Mooge

Deeqaay wanaageey

Dawo caafimaadeey

Hantidii dadkaygaay

Dhaxalkii dirkaygaay

Dhaxantiyo darrooraha

Dadab laga gelaayeey;

Dayax iyo cadceedeey

Dabka lagu hirtaayeey

Duco qabe ka xeel dheer?

Dabarkiyo mareerkee?

Digarogashadaadana

Degdeg laygu keenoo

Aniguba daaraddaa

Waan soo dabbaashee

Allahayow nin daacada

Allahayow nin daallina

Deeqdaada haw simin!

Shankarroon

Dantu wadajir guud bay

Dayac kaga fogaataa

Karti iyo dadaal baa

Gobannimo daryeelee

Dadku wuxuu ka maalaa

Kolba siduu u daajee;

Ma dabbaaldeggaygiyo

Caawa dadabgalkaygaa

Dumarkiyo carruuruhu

Igu diirsadeenoo!

Dooggiyo barwaaqada

Farxad daawanayee

Bal dayaay ayaamuhu

Isku derejo maahee!

Allahayow nin daacada

Allahayow nin daallina

Deeqdaada haw simin!

HEESO DAAWASHO AH/LYRICS